قاصد / چکھلی : ایس ٹی ڈیپارٹمنٹ میں کنڈکٹر کے عہدے پر کام کرنے والے 35 سالہ ملیند وجے جادھو نے کھیت میں ایک نیم کے درخت پر پھانسی لگا کر خودکشی کر لی، یہ واقعہ چکھلي تحصیل کے کنہولا گاؤں میں آج 9 اکتوبر کو صبح سامنےآیا۔ ان کی خودکشی کی وجہ ابھی تک سامنے نہیں آ سکی ہے۔
چکھلی تحصیل کےکنہولہ گاؤں کے رہائشی 35 سالہ ملیند وجے جادھو اور ان کی بیوی چکھلی ایس ٹی ڈیپارٹمنٹ میں کنڈکٹر کے عہدے پر کام کرتے تھے۔ان کی ہفتہ وار چھٹی کی وجہ سے وہ منگل کو گھر پر کینہولا گئے تھے۔ شام کو گھر والوں کو کچھ نہ بتا کر گھر سے نکل گئے۔ دوسرے دن ان کی ڈیوٹی تھی اس لیے چکھلی ایس ٹی ڈیپارٹمنٹ سے ان کو فون کیا گیا۔ ملنے والی معلومات کے مطابق ان کا فون ان کی بیوی نے اٹھایا اور بتایا کہ وہ باہر گئے ہیں گھر آنے کے بعد بھیج دیں گی۔ مگر تین دن گزر گئے تب بھی وہ گھر واپس نہ آئے تو گھر والوں نے ان کی تلاش شروع کی مگر وہ کہیں نہیں ملے۔ مگر 9 اکتوبر کو صبح بکریاں چرانے کے لیے کچھ لوگ کھیت میں گئے تو ان کو کھیت میں ملیند وجے جادھو کی لاش ایک نیم کے درخت پر نائیلون رسی سے پھانسی لگا کر لٹکتی ہوئی نظر آئی، انہوں نے فوراً اس واقعہ کی اطلاع گاؤں میں دی۔ یہ اطلاع ملتے ہی گاؤں والے واقعہ کی جگہ پہنچ گئے اور جو کچھ ہوا اس کی اطلاع پولیس اور اس ٹی ڈیپارٹمنٹ مینیجر کو دی تو مینیجر سنتوش جوگدنڈے، لامکانے اور پولیس اہلکاروں نے فوراً واقعہ کی جگہ پر پہنچ کر پانچ نامہ کر کے رپورٹ درج کی۔
