क़ासीद / अंढेरा : दि. २५ ऑक्टोबर २०२५(प्रतिनिधी) : बुलढाणा जिल्ह्यातील अंढेरा पोलिस ठाण्याच्या हद्दीत एक अत्यंत हृदयद्रावक आणि धक्कादायक घटना घडली आहे. रुई (ता. वाशिम) येथील राहणाऱ्या आणि पुण्यातील खाजगी कंपनीत नोकरी करणाऱ्या राहुल चव्हाणने आपल्या दोन जुळ्या मुलींचा गळा कापून निर्दयपणे खून केल्याची घटना उघडकीस आली आहे. प्रवासादरम्यान नवरा-बायकोमधील किरकोळ वादातून सदर घटना घडली असून, आरोपीने स्वतः वाशिम पोलिस स्टेशनमध्ये जाऊन संपूर्ण कृत्याची कबुली दिली आहे. पोलिसांनी घटनास्थळी जाऊन पंचनामा केला असून, तपास सुरू आहे. या घटनेमुळे परिसरात खळबळ उडाली असून, निष्पाप बालिकांच्या मृत्यूमुळे सर्वसामान्य नागरिकांमध्ये भीती आणि संतापाची लहर उसळली आहे.
मिळालेल्या प्राथमिक माहितीनुसार, राहुल चव्हाण हा आपल्या पत्नी आणि दोन जुळ्या मुलींना घेऊन पुण्याहून वाशिमकडे घरी परतत होता. कुटुंबीयांसह प्रवासादरम्यान किरकोळ कारणावरून नवरा-बायकोमध्ये वाद झाला. वाद वाढत गेला आणि संतापलेल्या पत्नीने माहेरी जाण्याचा निर्णय घेतला. यानंतर राहुलने आपल्या दोन मुलींना घेऊन प्रवास पुढे चालू ठेवला. मात्र, रागाच्या उन्मादात त्याने अंढेरा फाट्याजवळील एका निर्जण परिसरात गाडी थांबवली आणि तिथे मुलींचा गळा कापण्याचा भयावह प्रकार केला.
या कृत्यानंतर राहुल स्वतः वाशिम पोलिस स्टेशनमध्ये दाखल झाला आणि संपूर्ण घटना कबुल केली. पोलिसांनी त्याला ताब्यात घेऊन अंढेरा फाटा परिसरातील जंगलात तात्काळ धाव घेतली आणि घटनास्थळाचा पंचनामा केला.
घटनेची माहिती मिळताच डीवायएसपी मनिषा कदम, संतोष खराडे, अंढेरा पोलिस ठाण्याचे ठाणेदार शक्करगे, पोलीस अधिकारी जारवार, फूसे, जाधव यांच्यासह मोठी पोलिस टीम परिसरात पोहोचली. त्यांनी घटनास्थळाची कसून तपासणी केली आणि पुरावे गोळा केले. “आरोपीने स्वतः कबुली दिल्याने तपास सोपा झाला असला तरी, घटनेचे नेमके कारण आणि मानसिक स्थितीचा तपास सुरू आहे.
