विशेष

करवंड शाळेमध्ये उच्चविद्याविभूषित माजी विद्यार्थी आकाशचा सत्कार

क़ासिद / शेख मुख्तार (करवंड): चिखली तालुक्यातील ISO मानांकन प्राप्त जिल्हा परिषद मराठी उच्च प्राथमिक शाळा, करवंड येथे नुकताच शाळेच्या शालेय मंत्रिमंडळ आमसभेच्या निमित्ताने शाळेचे माजी विद्यार्थी प्रा. आकाश अशोक करंडे यांचा सहृदय सत्कार करण्यात आला.

दर महिन्याला विद्यार्थ्यांच्या शैक्षणिक, सांस्कृतिक व शिस्तविषयक प्रश्नांवर चर्चा करून त्यांचे निराकरण करण्यासाठी शाळेत शालेय मंत्रिमंडळ आमसभा आयोजित केली जाते. यावेळी प्रमुख अतिथी म्हणून प्रा. करंडे उपस्थित राहिले आणि त्यांनी विद्यार्थ्यांशी प्रेरणादायी संवाद साधला.

प्रा. आकाश करंडे यांनी आपल्या गावातील जिल्हा परिषद शाळेतून इयत्ता पहिली ते सातवीपर्यंत मातृभाषेतून शिक्षण घेतले. त्यानंतर त्यांनी भूगर्भशास्त्र (Geology) विषयात एम.एस्सी. मध्ये गोल्ड मेडल मिळविले. शिक्षकी पेशाची आवड असल्यामुळे त्यांनी बी.एड. पूर्ण करत असतानाच पृथ्वी विज्ञान विषयात सेट परीक्षा उत्तीर्ण केली.

यानंतर टेट परीक्षेद्वारे सिंधुदुर्ग जिल्ह्यात प्राथमिक पदवीधर शिक्षकपदी त्यांची निवड झाली. त्याचबरोबर या वर्षी महाराष्ट्र लोकसेवा आयोगामार्फत (MPSC) त्यांची भूवैज्ञानिक  (Geologist) शासनाची राजपत्रित अधिकारी म्हणून निवड झाली होती. मात्र ज्ञानदानाची प्रखर आवड लक्षात घेऊन त्यांनी अधिकारी पदाचा त्याग करून प्राध्यापक पदाची वाट निवडली.

सध्या ते सायन्स कॉलेज, नांदेड येथे अधिव्याख्याता (Lecturer) म्हणून कार्यरत आहेत आणि त्याचबरोबर नागपूर विद्यापीठात भूशास्त्रातील पुराजिवशास्त्र विषयात पीएच.डी. संशोधन करीत आहेत.

विद्यार्थ्यांशी संवाद साधताना त्यांनी सांगितले की, “मी मातृभाषेतून शिकलेलो आहे आणि त्याच शिक्षणातून सुवर्ण पदक  तसेच शासकीय नोकरी मिळवली. आपल्या गावातील शाळाच आपली खरी पायाभरणी करते. कॉन्व्हेंटमध्ये शिकल्याशिवाय यश मिळत नाही हा गैरसमज दूर व्हावा. मराठी शाळा टिकवा, वाचवा – ही आपली जबाबदारी आहे.”

या संवादादरम्यान त्यांनी इयत्ता पाचवी आणि आठवीच्या विद्यार्थ्यांना शिष्यवृत्ती परीक्षा, NMMS आणि विविध स्पर्धा परीक्षांचे महत्त्व समजावून सांगितले व विद्यार्थ्यांना स्पर्धा परीक्षांची पुस्तके भेट दिली. तसेच भविष्यात अशा परीक्षांसाठी मार्गदर्शन करण्याचे आश्वासनही दिले.

प्रा. करंडे यांनी आपल्या बालपणीचे आठवणींना उजाळा देताना सांगितले की, “आज मी जे काही आहे, ते माझ्या शिक्षकांमुळेच.” वीस-बावीस वर्षांपूर्वी त्यांना शिकविणारे कल्पना पाटील, विकास बाहेकर, राजेंद्र वाळके हे शिक्षक सध्या शाळेत कार्यरत असून, त्यांच्याप्रती त्यांनी कृतज्ञता व्यक्त केली.

शाळेचा संपूर्ण परिसर या प्रसंगी आनंदाने उजळून निघाला होता. आपल्या शाळेत शिकलेला विद्यार्थी आज उच्च शिक्षण, संशोधन आणि अध्यापन क्षेत्रात उल्लेखनीय झेप घेत असल्याचे पाहून सर्व विद्यार्थी, शिक्षक व ग्रामस्थ भारावून गेले.

या कार्यक्रमाला शाळेचे मुख्याध्यापक भास्कर खंडागळे, तसेच गजानन काकडे, विकास बाहेकर, मदन सावळे, राजेंद्र वाळके, गौतम गायकवाड, अनिल सिताफळे, सुनील बाहेकर, नामदेव चव्हाण, कल्पना पाटील, माधुरी दांडगे, संगीता खरात आणि दीपक भालेराव हे शिक्षक उपस्थित होते.

कार्यक्रमाचे सुत्रसंचालन दीपक भालेराव सरांनी केले. संपूर्ण आमसभा व सत्काराचा कार्यक्रम उत्साहात पार पडला.

Leave a Reply

Your email address will not be published. Required fields are marked *