चिखली डी.पी. रोडवर किराणा आणि कापड दुकान फोडले.

क़ासीद / रमीज़ राजा (चिखली, दि. २८ ऑक्टोबर २०२५) : स्थानिक चिखली शहरातील डी.पी. रोड हे आता गुंडगिरी आणि चोरीच्या घटनांचे हॉटस्पॉट बनले आहे. मंगळवारी रात्री उशीरा घडलेल्या दोन सलग चोरीच्या घटनांमुळे नागरिकांमध्ये भीतीचे वातावरण पसरले आहे. डी.पी. रोडवरील जनता किराणा दुकान आणि शीतल कलेक्शन सेंटरवर चोरट्यांनी हल्ला करून रोकड लंपास केल्याची घटना आज दिनांक 28 ऑक्टोंबर रोजी उघडकीस आली आहे. पोलिसांनी घटनास्थळी पंचनामा करून तपास सुरू केला असला तरी, स्थानिकांच्या म्हणण्यानुसार, पोलिसांच्या नाकर्तेपणामुळे अशा घटना वाढत आहेत. या घटनांमुळे नागरिकांकडून पोलिस प्रशासनावर तीव्र नाराजी व्यक्त होत आहे.

मिळालेल्या माहितीनुसार, मंगळवारी रात्रीच्या सुमारास अज्ञात चोरट्यांनी डी.पी. रोडवरील भीष्मा गुरुदासनी यांच्या जनता किराणा दुकानचे शटर तोडून आत दुकानातील रोख रक्कम अंदाजे २२ ते २५ हजार लंपास केले. तसेच दुकानातील काही किराणा साहित्यही छिन्नभिन्न करण्यात आले, ज्यामुळे दुकानदाराला मोठा फटका बसला आहे.

याच ठिकाधी जनता किराणाच्या बाजुला असलेल्या श्रीचंद गुरुदासनी यांच्या शीतल कलेक्शन सेंटरवरही चोरट्यांनी हात साफ केला. शीतल कलेक्शन सेंटरवर ५ ते ७ हजार रुपयांची नगद रक्कम लंपास करण्यात आली. याशिवाय, दुकानातील सीसीटीव्ही कॅमेरा आणि डीव्हीआर (डिजिटल व्हिडिओ रेकॉर्डर) देखील चोरले गेले. या दोन्ही घटनांमुळे एकूण ३० हजारांहून अधिकची आर्थिक हानी झाली असून, दुकानदारांना मानसिक धक्काही बसला आहे.

चिखलीतील डी.पी. रोड हे पूर्वी व्यावसायिक आणि शांत क्षेत्र म्हणून ओळखले जायचे. मात्र, गेल्या काही महिन्यांत या रोडवर चोरी, मोबाईल चोरी आणि गुंडगिरीच्या घटना वाढल्या आहेत. स्थानिक व्यापाऱ्यांनी सांगितले की, दररोज किमान दोन-तीन घटना या परिसरात घडत असतात.