चिखली नगर परिषद प्रभागनिहाय आरक्षण जाहीर, निवडणुकीत राहणार मुस्लीम मतांचा निर्णायक वाटा

क़ासीद / चिखली (इफ्तेखार खान) : नगर परिषद सार्वत्रिक निवडणूक २०२५ च्या तयारीला वेग आला आहे. नगराध्यक्ष पदाचे आरक्षण जाहीर झाल्यानंतर आज (८ ऑक्टोबर) रोजी चिखली नगरपरिषदेच्या २८ जागांसाठी प्रभागनिहाय आरक्षणाची सोडत नगरपरिषद सभागृहात काढण्यात आली. या सोडतीत अनुसूचित जाती (एससी) प्रवर्गासाठी ५, इतर मागासवर्गीय (ओबीसी) प्रवर्गासाठी ८ तर उर्वरित १५ जागा सर्वसाधारण प्रवर्गासाठी खुल्या ठेवल्या गेल्या आहेत.

सोडतीचा कार्यक्रम दुपारी ३ वाजता बुलढाणा उपविभागीय अधिकारी शरद पाटील आणि चिखली नगरपरिषदेचे मुख्याधिकारी प्रशांत बिडगर यांच्या उपस्थितीत पार पडला. या वेळी सर्व पक्षांचे पदाधिकारी, कार्यकर्ते, पत्रकार आणि नागरिक मोठ्या संख्येने उपस्थित होते. संपूर्ण प्रक्रिया पारदर्शक पद्धतीने पार पाडण्यात आली.

प्रभागनिहाय आरक्षण तपशील
प्रभाग क्र. १ : (अ) मा. प्रवर्ग (OBC), (ब) स.सा. महिला (Open)
प्रभाग क्र. २ : (अ) मा. प्रवर्ग (OBC), (ब) स.सा. महिला (Open)
प्रभाग क्र. ३ : (अ) अ.जाती महिला (SC), (ब) स.सा. (Open)
प्रभाग क्र. ४ : (अ) मा. प्रवर्ग (OBC), (ब) स.सा. महिला (Open)
प्रभाग क्र. ५ : (अ) मा. प्रवर्ग महिला (OBC), (ब) स.सा. (Open)
प्रभाग क्र. ६ : (अ) मा. प्रवर्ग (OBC), (ब) स.सा. महिला (Open)
प्रभाग क्र. ७ : (अ) मा. प्रवर्ग महिला (OBC), (ब) स.सा. (Open)
प्रभाग क्र. ८ : (अ) स.सा. महिला (Open), (ब) स.सा. (Open)
प्रभाग क्र. ९ : (अ) मा. प्रवर्ग महिला (OBC), (ब) स.सा. (Open)
प्रभाग क्र. १० : (अ) अ.जाती (SC), (ब) स.सा. महिला (Open)
प्रभाग क्र. ११ : (अ) मा. प्रवर्ग महिला (OBC), (ब) स.सा. (Open)
प्रभाग क्र. १२ : (अ) अ.जाती महिला (SC), (ब) स.सा. (Open)
प्रभाग क्र. १३ : (अ) अ.जाती (SC), (ब) स.सा. महिला (Open)
प्रभाग क्र. १४ : (अ) अ.जाती महिला (SC), (ब) स.सा. (Open)

नागरिकांचा उत्साह आणि गर्दी
सोडतीच्या वेळी नगरपरिषद सभागृहात प्रचंड गर्दी पाहायला मिळाली. नागरिक, सामाजिक कार्यकर्ते तसेच विविध राजकीय पक्षांचे कार्यकर्ते आपापल्या प्रभागाचे आरक्षण जाणून घेण्यासाठी मोठ्या उत्साहाने हजर होते. संपूर्ण सोडत पारदर्शक वातावरणात पार पाडण्यात आल्याने नागरिकांनी समाधान व्यक्त केले.

निवडणूक रंगणार रंगतदार
या आरक्षणानंतर आता चिखलीतील राजकीय समीकरणांना वेगळे वळण मिळण्याची शक्यता आहे. अनेक संभाव्य उमेदवार आपल्या प्रभागातील आरक्षणानुसार रणनीती आखू लागले आहेत. आगामी काही दिवसांत पक्षांमध्ये उमेदवार निवडीच्या हालचालींना वेग येईल, असे राजकीय वर्तुळात बोलले जात आहे. त्यामुळे चिखली नगरपरिषद निवडणुकीत यंदा रंगतदार लढत होण्याची चिन्हे स्पष्ट झाली आहेत.