क़ासीद / चिखली : शहरातील बैलजोडी परिसरात आज दिनांक 9 जानेवारी 2026 रोजी दुपारी एक दुर्दैवी घटना घडली. राहत्या घरात कोणीही नसताना एका ४० वर्षीय महिलेने छताच्या पंख्याला साडीने गळफास घेऊन आत्महत्या केल्याचे उघडकीस आले. या घटनेमुळे परिसरात शोककळा पसरली असून नागरिकांमध्ये मोठी खळबळ उडाली आहे.
मीना राजू महाजन (वय ४०) असे आत्महत्या केलेल्या महिलेचे नाव आहे. मिळालेल्या माहितीनुसार, दुपारी सुमारे १ वाजताच्या सुमारास मीना महाजन या घरात एकट्याच होत्या. याच काळात त्यांनी खुर्चीच्या साहाय्याने छताच्या पंख्याला साडी बांधून गळफास घेतला. काही वेळाने ही बाब लक्षात येताच शेजाऱ्यांनी तत्काळ पोलिसांना माहिती दिली.
घटनेची माहिती मिळताच चिखली पोलीस ठाण्याचे अधिकारी व कर्मचारी तातडीने घटनास्थळी दाखल झाले. पोलिसांनी घटनास्थळाचा पंचनामा करून मृतदेह ताब्यात घेतला. त्यानंतर शवविच्छेदनासाठी मृतदेह चिखली येथील उपजिल्हा रुग्णालयात पाठवण्यात आला आहे.
दरम्यान, मीना महाजन यांनी आत्महत्येसारखे टोकाचे पाऊल का उचलले, याचे कारण अद्याप स्पष्ट झालेले नाही. कौटुंबिक अथवा मानसिक कारणे होती का, याबाबत पोलिसांकडून चौकशी सुरू आहे. या प्रकरणी प्राथमिक स्वरूपात अकस्मात मृत्यूची नोंद करण्यात येत असून, चिखली पोलीस सर्व बाजूंनी सखोल तपास करीत आहेत.
