जिल्हा राष्ट्रवादी काँग्रेसचा निवडणुकीचा बिगुल; युती असो वा नसो, पूर्ण ताकदीनिशी लढणार – शंतनू बोंद्रे

क़ासीद / चिखली १८ ऑक्टोबर २०२५ : आगामी जिल्हा परिषद , पंचायत समिती तसेच नगरपालिका निवडणुकांच्या पार्श्वभूमीवर बुलढाणा जिल्ह्यातील राष्ट्रवादी काँग्रेस पक्षाने आज जोरदार शिंग फुंकले. पक्षाचे जिल्हा कार्याध्यक्ष शांतनू बोंद्रे यांनी स्पष्ट शब्दांत सांगितले की, युती होवो की नको, पक्ष पूर्ण ताकदीनिशी निवडणुका लढविण्यास पूर्णपणे सक्षम आहे. या तयारीचा भाग म्हणून चिखली तालुक्यातील बाजार समितीच्या सभागृहात आज दिनांक १८ ऑक्टोबर २०२५ रोजी पक्षाची तालुका स्तरावरील महत्त्वपूर्ण बैठक पार पडली. या बैठकीत कार्यकर्त्यांमध्ये जोरदार उत्साह दिसून आला, तर पक्षाने स्थानिक स्वराज्य संस्थांच्या निवडणुकीसाठी गावोगावी जनसंपर्क वाढवण्याचा संकल्प केला.

बैठकीस तालुका व शहरातील पदाधिकारी, कार्यकर्ते तसेच स्थानिक जनता मोठ्या संख्येने उपस्थित होती. पक्षाचे तालुकाध्यक्ष संतोष परिहार व शहराध्यक्ष तुषार बोंद्रे यांच्या वतीने आयोजित या बैठकीचे अध्यक्षस्थान जिल्हा कार्याध्यक्ष शंतनू बोंद्रे यांनी भूषवले. शंतनु बोंद्रे म्हणाले, “स्थानिक स्वराज्य संस्थांमध्ये युतीचा मुद्दा काहीही असो, कार्यकर्त्यांनी खांद्यावर आपल्या पक्षाचा झेंडा घेऊन गावोगावी जाऊन जनसंपर्क वाढवावा. सामान्य जनतेची कामे करत आलात म्हणूनच जनता तुमचे नेतृत्व स्वीकारेल. जनता सोबत असल्यास पक्ष तर सोडा, विरोधी पक्ष सुद्धा तुमचा उल्लेख नेता म्हणून करेल.” पुढे बोलतांना शंतनु बोंद्रे यांनी सांगितले की, राष्ट्रवादी काँग्रेस हा नेहमीच सामान्य माणसाच्या हक्कांसाठी लढणारा पक्ष राहिला आहे. आगामी निवडणुकांमध्ये पक्ष पूर्ण ताकदीनिशी उतरणार असून, तालुक्यातील कार्यकर्त्यांनी स्थानिक समस्या सोडवण्यावर भर द्यावा. “जनतेच्या अपेक्षांना प्राधान्य देऊनच पक्ष मजबूत होईल. युतीचा निर्णय अंतिम टप्प्यात असेल, पण आम्ही तयार आहोत,” असे त्यांनी ठामपणे सांगितले. या बैठकीमुळे चिखली तालुक्यातील पक्ष कार्यकर्त्यांमध्ये नवीन ऊर्जा संचारली असून, गावपातळीवर जनसंपर्क मोहिमेला वेग येणार आहे.

या बैठकीला पक्षातील अनेक प्रमुख नेते व कार्यकर्ते उपस्थित होते. यामध्ये श्री. मनोज दांडगे, श्री. दत्ता खरात, श्री. विजय अंभोरे, श्री. संतोष परिहार, शहराध्यक्ष तुषार बोंद्रे, वसीम खान, श्री. रुपेश गवई, श्री. उमेश राठोड, डॉ. नितीन पाटील, श्री. सुनील सुरडकर, नजीर खान, विलास वसु, श्री. एकनाथ सुरडकर, योगेश गवते, विशाल थुट्टे, रामेश्वर इंगळे, दत्तात्रय परिहार, राजू झिने, प्रफुल्ल भुतेकर, संतोष आटोळे, आसिफ शेख, फिरोज खान, दस्तगीर ठेकेदार, सिद्धांत शिराळे, संतोष भोलवणकर, शेख सलीम, नजीर खान, निलेश रक्ताळे, राम कुसळकर, जमीर भाई, गजानन खवसे, निलेश गोयंका, बळी हाडे, अनंता वायसे, रवी सुरुशे, कादिर भाई, रवी डाळिंबकर, विलास वसु यांच्यासह असंख्य कार्यकर्ते सहभागी झाले होते. या नेत्यांनी बैठकीत विविध मुद्द्यांवर आपले मत मांडले आणि पक्षाच्या विजयासाठी विविध कार्यक्रमांचे योजना आखल्या.

तालुक्यात राष्ट्रवादी काँग्रेसचा प्रभाव वाढत असून, या बैठकीमुळे पक्षाची निवडणूक यंत्रणा अधिक मजबूत झाली आहे. कार्यकर्त्यांनी ठरवले की, पुढील काही दिवसांत गावोगावी जागृती मोहिमा राबवल्या जातील. जनतेच्या समस्या ऐकून त्यांचे निराकरण करण्यावर भर देण्यात येईल. युतीचा निर्णय अद्याप प्रलंबित असला तरी पक्षाने पूर्ण ताकदीनिशी लढण्याची तयारी पूर्ण केली आहे. या घडामोडीमुळे तालुक्यातील राजकीय वातावरण तापले असून, इतर पक्षांच्या हालचालींनाही वेग येणार आहे. राष्ट्रवादी काँग्रेसचे हे पाऊल स्थानिक स्वराज्य संस्थांच्या निवडणुकांसाठी मैदान सजवण्यासारखे आहे. पक्ष कार्यकर्त्यांच्या उत्साहाने येणाऱ्या निवडणुका रोमांचक होणार, याची चिन्हे दिसू लागली आहेत.

उदयनगर सर्कल मधुन कोण लढणार ?
आगामी जिल्हा परिषद व पंचायत समिती निवडणुकांच्या रिंगणात उदयनगर सर्कलमधून विविध पक्षांतर्फे इच्छुकांची नावे समोर आले तरी जनतेत मात्र बोंद्रे यांच्याच नावाची सर्वाधिक चर्चा होत असल्याचे समजते. पक्षाने तालुकाभरात निवडणुका पूर्ण ताकदीने लढण्याचा निर्धार जाहीर केल्यानंतर बोंद्रे यांच्या लढतीला अधिकच पाठबळ मिळाले असून, त्यांची उमेदवारी ‘फिक्स’ झाल्याचे आणि विजय निश्चित असल्याचे पक्षांतर्गत बोलले जात आहे. या घडामोडीमुळे उदयनगर सर्कलमधील राजकीय वातावरण तापले असून, इतर पक्षांच्या उमेदवारांना नवीन आव्हान उभे राहिले आहे.