जिल्ह्यात सलग चौथा खून: अंढेरा येथे तरुणाची तीक्ष्ण शस्त्राने हत्या;

अंढेरा / रमिज राजा : बुलढाणा जिल्ह्यात गुन्हेगारीचे प्रमाण वाढत असल्याची बाब पुन्हा एकदा समोर आली आहे. एकाच दिवसात घडलेल्या चौथ्या खुनाने संपूर्ण जिल्हा हादरून गेला असून, नागरिकांमध्ये भीती आणि संतापाची लाट उसळली आहे. देऊळगाव राजा तालुक्यातील अंढेरा गावात आकाश उत्तम चव्हाण (वय २५, रा. आसोला बु) या युवकाची तीक्ष्ण शस्त्राने निर्दयीपणे हत्या करण्यात आली. धक्कादायक म्हणजे ही घटना अंढेरा पोलीस स्टेशनपासून अवघ्या काही अंतरावर घडली, ज्यामुळे पोलिसांच्या कार्यक्षमतेवर गंभीर प्रश्नचिन्ह निर्माण झाले आहे.

मिळालेल्या प्राथमिक माहितीनुसार, ही घटना आज दिनांक 25 ऑक्टोबर रोजी संध्याकाळी सुमारे 6 वाजता अंढेरा बाजार गल्ली परिसरात घडली. आकाश चव्हाण आपल्या दैनंदिन कामकाजासाठी बाजारात आला होता. हल्लेखोराने त्याच्यावरअचानक तीक्ष्ण शस्त्राने वार केले. हल्ला इतका प्रखर होता की, आकाशचा तात्काळ घटनास्थळीच मृत्यू झाला. आरोपी म्हणून अयान सय्यद नासीर (वय अंदाजे १८ ते २०, रा. अंढेरा) याचे नाव समोर आले आहे. प्राथमिक तपासात समोर आलेल्या माहितीनुसार, हा हल्ला वैयक्तिक वैरापोटी झाल्याची शक्यता आहे. दोघांमधील जुने वाद हे कारण असू शकते, असे स्थानिक रहिवाशांचे म्हणणे आहे. मात्र, पोलिसांनी याबाबत अधिक तपास सुरू केला असून, आरोपीला ताब्यात घेण्याचे प्रयत्न सुरू आहेत.

खुनाची वार्ता मिळताच मेहकरचे उपविभागीय पोलिस अधिकारी खर्डे यांच्या नेतृत्वात अंढेरा पोलीस स्टेशनचे अधिकारी आणि कर्मचारी घटनास्थळी दाखल झाले. पोलिसांनी परिसराला वेढा घालून तपास सुरू केला आहे.