दिवाळीच्या आनंदावर पडली अपघाताची सावली: अमडापूरजवळ भरधाव रेती टिप्परने एका अज्ञात व्यक्तीला उडवले, जागीच मृत्यू

क़ासीद / सैय्यद साहील (चिखली) : संपूर्ण देशात दिवाळीचा सोनेरी प्रकाश आणि कुटुंबासोबतचा आनंद साजरा होत असताना, चिखली तालुक्यातील अमडापूर-चिखली रोडवर टाकरखेड (मु.) शिवारातील महादेव मंदिराजवळ एक हृदयद्रावक अपघात घडला. टाकरखेड मुसलमान गावाजवळील महादेव मंदिरासमोर रस्त्याच्या कडेला उभ्या असलेल्या एका व्यक्तीचा भरधाव रेती टिप्परच्या धडकेत अक्षरशः चेंदामेंदा झाला असुन घटनास्थळीच मृत्यु झाला. या घटनेने स्थानिक नागरिकांमध्ये भीती आणि शोकाची लाट उसळली असून, दिवाळीच्या शुभ दिवशी अशी दुर्दैवी घटना घडणे अत्यंत दुखद आहे.

सदर घटना आज संध्याकाळी अंदाजे सुमारे सहा वाजेच्या सुमारास घडली असुन प्रत्यक्षदर्शींच्या सांगण्यानुसार, अमडापूर-चिखली महामार्गावरील टाकरखेड (मु.) शिवारात महादेव मंदीराजवळ भागात रेती भरलेले अज्ञात टिप्पर भरधाव वेगाने जात होते. मंदिरासमोर रस्त्याच्या कडेवर उभ्या असलेल्या त्या व्यक्तीला टिप्परने जोरदार टक्कर दिली. या धडकेने अज्ञात व्यक्तीचा अक्षरशः चंदामेंदा झाला. घटनास्थळावरील दृश्य पाहून प्रत्यक्षदर्शी आणि स्थानिक नागरिकांच्या अंगावर अक्षरश: काटे उभे राहिले. स्थानीकांच्या मते “टिप्पर इतक्या वेगात होता की, धडक मारुन सुसाट वेगाने निघुन गेले. आरडा ओरडा करत नागरीकांनी टिप्पर थांबविण्याचे प्रयत्न केले परंतु त्यांना काही यश आले नाही.

अमडापूर पोलिसांनी तात्काळ घटनास्थळी दाखल होऊन पंचनामा केला आणि मृतदेह उत्तरीय तपासणीसाठी उपजिल्हा रुग्णालय, चिखली येथे हलविले आहे. अमडापूर-चिखली रोड हा वाहतुकीसाठी व्यस्त मार्ग आहे. या भागात वारंवार अपघात घडत असल्याने स्थानिक नागरिकांमध्ये रोष आहे. या अपघाताने गावकऱ्यांच्या दिवाळीच्या आनंदावर पाणी पडले.