क़ासिद / इफ्तेखार खान: चिखली नगरपालिकेच्या येणाऱ्या पंचवार्षिक निवडणुकीचा काळ सुरू झाला असून, इच्छुक उमेदवारांच्या मुलाखती, भेटीगाठी आणि मोर्चेबांधण्या जोर धरत आहेत. काँग्रेस, भाजपासह विविध पक्ष आणि आघाड्या जनतेत आपापली बाजू मांडत असताना, प्रभाग क्रमांक ४ मधील मतदारांची इच्छा मात्र स्पष्ट झाली आहे. गेल्या पंचवार्षिक काळात प्रभाग क्रमांक ४ मधील निष्क्रिय ठरलेल्या नगरसेवकांवर जनतेचा रोष वाढत असून, याच प्रभागातील मतदार एका चेहऱ्याकडे आकर्षित होत आहेत – तो म्हणजे शेख करामत यांचा चेहरा. ‘प्रभाग ४ मधील जनतेची इच्छा, आम्हाला हवा करामत भाई, माणूस सच्चा’ असा घोषवाक्य घेऊन मतदारांनी त्यांच्या समर्थनाची भूमिका घेतली आहे.चिखली नगरपालिका अंतर्गत प्रभाग पुनर्रचना झाल्याने जुना प्रभाग क्रमांक २ हा नवीन प्रभाग क्रमांक ४ मध्ये रूपांतरित झाला आहे. या प्रभागातील नगरसेवकांच्या कामकाजावर जनतेच्या तक्रारींनी प्रश्नचिन्ह निर्माण केले आहे. गेल्या निवडणुकीत प्रभाग क्रमांक ४ मधील दोन्ही नगरसेवक काँग्रेस पक्षाच्या वतीने निवडून आले होते. मात्र, त्यांच्या पंचवार्षिक काळात आणि त्यानंतरच्या प्रशासकीय काळात त्यांचे कामकाज निष्क्रिय ठरले. आपली निष्क्रियता लपविण्यासाठी एका नगरसेवकाने राजकीय चक्रव्युहात सापडून भाजपाचे फुल हातात धरले असून, दुसऱ्या नगरसेवकाला पक्षांतर्गत दबावामुळे जवळपास संन्यास घ्यावा लागला आहे. या दोघांनाही चिखली नगरपालिकेतील ‘सर्वात जास्त निष्क्रिय’ नगरसेवक म्हणून ओळखले जात आहे.या पार्श्वभूमीवर शेख करामत यांचे नाव मात्र सातत्याने चर्चेत आहे. गेल्या निवडणुकीत पराभव स्वीकारावा लागला असला तरी शेख करामत यांनी हार मानली नाही. उलट, पराभवातून खचून न जाता, आपल्यावर विश्वास टाकून मतदान करणाऱ्या आपल्या प्रभागातील मतदारांना वाऱ्यावर सोडले नाही. सलग ९ वर्षांपासून ते स्वतंत्रपणे प्रभागातील मतदारांची सेवा करत आहेत.
प्रभागातील रस्ते, गटारी, साफसफाईसारख्या मूलभूत समस्या सोडवण्यापासून ते मतदारांच्या वैयक्तिक अडचणींपर्यंत – सर्वकाही त्यांनी स्वतः उभे राहून हाताळले आहे. “करामत भाईंनी कधीच राजकीय फायद्याचा विचार केला नाही. ते नेहमीच आमच्या सोबत उभे राहिले,” असे प्रभागातील मतदार उघडपणे बोलत आहे.प्रभाग क्रमांक ४ मधील विविध वयोगटातील मतदारांशी बोलताना शेख करामत यांच्या समर्थनाची लहर दिसून येते. मतदारांनी सांगितले की प्रभागातील नाल्या बंद होऊन पाणी साचले होते. नगरपालिकेकडे तक्रार केली, पण दादागिरी चालू होती. तेव्हा शेख करामत आले आणि स्वतः मजूर आणून काम करून दिले. असाच माणूसच आम्हाला हवा आहे. शेख करामत यांचे हे कार्य केवळ भौतिक नसून, भावनिक पातळीवरही आहे. प्रभागातील लग्नसोहळे किंवा कुटुंबातील संकटकाळात ते नेहमीच सहभागी होतात असे प्रभागातील महिलांनी सांगितले. या सर्वामुळे प्रभागातील मतदारांत त्यांच्या समर्थनाची चर्चा जोरात आहे. राजकीय पक्षांच्या मोर्चेबांधण्या जोर धरत असताना, शेख करामत आपले मत मांडतांना सांगतात, “मी निस्वार्थी असून प्रभागातील मतदारांची सेवा हाच माझा कर्तव्य आहे. जनतेची इच्छा पूर्ण करणे हेच माझे ध्येय आहे.काँग्रेस आणि भाजपाच्या नेत्यांमध्येही प्रभाग ४ च्या निवडणुकीबाबत चिंता वाढली आहे. निष्क्रिय नगरसेवकांमुळे पक्षाची प्रतिमा डागाळली गेली. आता शेख करामत यांसारखा लोकप्रिय चेहरा आम्हाला सोडवू शकतो असा एकसुर ऐकावयास मिळत आहे.शेख करामत यांच्यासारख्या निष्ठावान कार्यकर्त्यांच्या उदाहरणाने स्थानिक राजकारणात ‘सेवा’ ही संकल्पना पुन्हा जागृत होण्याची शक्यता आहे. प्रभाग ४ च्या मतदारांसाठी हा निवडणुकीचा काळ केवळ उमेदवार निवडण्याचा नसून, खऱ्या सेवकाला अभिवादन करण्याचा ठरणार आहे.
