क़ासिद / जाकीर खान : दि. ३१ ऑक्टोबर २०२५ : साखरखेर्डा बीबी रोडवरील दुसरबीड उड्डाणपूल जवळ आज रात्री सुमारे ९ वाजता घडलेल्या एका हृदयद्रावक अपघातात दोन तरुणांचा जागीच मृत्यू झाला. भरधाव वेगात असलेली दुचाकी दुभाजकावर जोरदार आदळली, ज्यामुळे दुचाकीचे तीन तुकडे झाले आणि घटनास्थळी रक्ताचा सडा पडला. मृतांमध्ये आरिफ तंबोली (वय ३५) आणि अल्ताफ तंबोली (वय २८, दोघेही रा. साखरखेर्डा) यांचा समावेश आहे. हे दोघेही एकमेकांसोबत बीबी येथील एका रिसेप्शनला गेले होते व परतताना हा अनर्थ घडला.
मिळालेल्या प्राथमिक माहितीनुसार आरिफ व अल्ताफ बीबी येथील एका लग्नाच्या रिसेप्शनला गेले होते. कार्यक्रमात सहभागी होऊन रात्री साखरखेर्डाकडे येत असताना त्यांची दुचाकी (क्रमांक MH-28 BJ-4029) दुसरबीड उड्डाणपूला जवळील सातबारा हॉटेलसमोर अपघात घडला. अपघात इतका जबर होता की दुचाकीचे अगदी तुकडे पडले आणि दोघेही जागीच ठार झाले.
अपघातानंतर घटनास्थळी एकच गोंधळ उडाला. रस्त्यावर रक्ताचा सडा पडला होता. दुचाकीचे अवशेष कित्येक फूट दूर उडाले होते. या अपघातामुळे बीबी रोडवरील वाहतुकीला काही वेळ अडथळा निर्माण झाला होता. पोलिसांनी घटनास्थळावर पंचनामा केला असून, मृतदेह शवविच्छेदनासाठी हलवले होते.
