महाराष्ट्र राज्य पतसंस्था फेडरेशन कडून संकल्प अर्बन पतसंस्थेला दीपस्तंभ पुरस्कार प्रदान !

क़ासीद / मुख्तार शेख : अल्पावधीतच आकाशी उंच भरारी घेतल्या संकल्प अर्बन को-ऑपरेटिव्ह क्रेडिट सोसायटीने उदयनगर आणि चिखली शाखांमधील ग्राहकांना विश्वासपूर्ण, पारदर्शक सेवा देऊन बँकिंग क्षेत्रात आपली अढळ ओळख निर्माण केली आहे. या प्रेरणादायी यशस्वी प्रवासाला आता राष्ट्रीय स्तरावर मान्यता मिळाली आहे!

महाराष्ट्र राज्य सहकारी पतसंस्था फेडरेशनच्या वतीने सन २०२५-२६ साठी ‘दीपस्तंभ पुरस्कार’ने संकल्प अर्बन पतसंस्थेचा गौरव करण्यात आला. हा सन्मान १२ ऑक्टोबर २०२५ रोजी कर्नाटकातील डेनिसन्स रिसॉर्ट, कुमाटे येथील भव्य कार्यक्रमात देण्यात आला. अमरावती विभागातील आर्थिक विकासाच्या क्षेत्रात दाखवलेल्या उत्कृष्ट नेतृत्व आणि प्रेरणादायी योगदानासाठी हा पुरस्कार प्रदान करण्यात आला.

फेडरेशनचे अध्यक्ष मा. श्री. काकासाहेब कोयटे आणि चिखली मतदारसंघातील मा. आमदार श्री. राहुल बोंद्रे यांच्या शुभहस्ते हा मानाचा पुरस्कार प्रदान करण्यात आला. या क्षणाला उपस्थित सर्वांचा कडकडून सन्मान करण्यात आला.

“हा पुरस्कार केवळ आमचा नाही, तर आमच्या सभासदांचा अटूट विश्वास, कर्मचारी वर्गाच्या अथक परिश्रम आणि महिला बचतगटांच्या एकजुटीचा गौरवपूर्ण क्षण आहे. हे आमच्या भावी वाटचालीसाठी प्रेरणास्रोत ठरेल,” असे पतसंस्थेचे अध्यक्ष श्री. ज्ञानेश्वर केनेकर आणि उपाध्यक्ष श्री. अक्षय करंडे यांनी व्यक्त केले. “समाजातील आर्थिक सबलीकरणाच्या दिशेने आमचे प्रयत्न यशस्वी झाल्याचे हे प्रमाण आहे. यापुढेही समाजाच्या सर्वांगीण विकासासाठी आम्ही निष्ठावानपणे कार्यरत राहू. हे साफल्य आमच्या ठेवीदार, सभासद आणि संकल्प अर्बन परिवाराच्या प्रत्येक कर्मचाऱ्याच्या श्रमाचे फळ आहे.”

संकल्प अर्बन पतसंस्थेच्या या यशाने स्थानिक बँकिंग क्षेत्रात नवे ध्येय उभे राहिले आहे. समाजाच्या आर्थिक सक्षमीकरणासाठी असा दृष्टिकोन प्रेरणादायी ठरेलच!