क़ासिद/असलम हिरिवाले : रायपुर गावाच्या हद्दीतील हातणी ते दुधा राष्ट्रीय महामार्गावर रबरचे गतिरोधक (स्पीड ब्रेकर्स) बसविण्याच्या मागणीसाठी एकता ग्रुप, रायपूरच्या वतीने जिल्हाधिकारी आणि रस्ता सुरक्षा समितीकडे निवेदन सादर करण्यात आले. मागणी पूर्ण न झाल्यास उपोषणाचा इशारा एकता ग्रुपचे अध्यक्ष मो. फयाज मो. एजाज यांनी दिला आहे.
रायपूर गाव हे राष्ट्रीय महामार्गावर वसलेले असून, येथे सैलानी बाबा तीर्थक्षेत्रामुळे वाहनांची नेहमीच प्रचंड वर्दळ असते. गावाच्या हद्दीत जिजाऊ इंग्लिश स्कूल, प्राथमिक आरोग्य केंद्र, पोलीस स्टेशन, शिवाजी हायस्कूल, आठवडी बाजार, खासगी दवाखाने, प्राथमिक उर्दू शाळा, पशुवैद्यकीय दवाखाना, कोचिंग क्लासेस, पेट्रोल पंप आणि अनेक व्यावसायिक प्रतिष्ठाने तसेच इतर गावांना जोडणारे रस्ते आहेत. विशेषतः संध्याकाळी ४ ते ८ या वेळेत भाजीपाला घेऊन जाणाऱ्या पिकअप आणि आयशर वाहनांचा भरधाव वेग अपघातांना निमंत्रण देत आहे.
यापूर्वी या रस्त्यावर अनेक अपघात झाले असून, काहींना जीव गमवावा लागला आहे, तर अनेक जण जखमी झाले आहेत. यामुळे वाहनांच्या गतीवर नियंत्रण ठेवण्यासाठी रस्त्यावर योग्य ठिकाणी गतिरोधक बसविणे अत्यावश्यक आहे, अशी मागणी निवेदनात करण्यात आली. यामुळे अपघातांचे प्रमाण कमी होण्यास मदत होईल, असे एकता ग्रुपने म्हटले आहे.
निवेदन सादर करताना एकता ग्रुपचे अध्यक्ष मो. फयाज मो. एजाज, उपाध्यक्ष मुकीम शाह कलीम शाह, सचिव शे. अजहर शेख अफसर, राजू नेता, शेख मजहर, इमरान खान, रेहान खान, शेख साहील, शहेजाद खान, सय्यद अनिस, शे. अयान, नसीम शाह, फारूक खान, आसिफ खान, शेख रिजवान, शेख जावेद यांच्यासह अनेक सदस्य उपस्थित होते.
