शैक्षणिक

शैक्षणिक व्हिडिओ निर्मिती स्पर्धेत श्री शिवाजी विद्यालयाच्या शेख अनिस सर यांना यश

इयत्ता सहावी ते आठवीच्या भाषा विषयात तालुकास्तरावर घेतला प्रथम क्रमांक

क़ासीद / चिखली : महाराष्ट्र राज्य शालेय शिक्षण व क्रीडा विभाग, महाराष्ट्र राज्य शिक्षण संशोधन व प्रशिक्षण परिषद पुणे तसेच जिल्हा शिक्षण व प्रशिक्षण संस्था यांच्या संयुक्त विद्यमाने आयोजित शिक्षकांसाठी दर्जेदार शैक्षणिक व्हिडिओ निर्मिती स्पर्धा २०२३-२४ मध्ये श्री शिवाजी विद्यालय, चिखली येथील शिक्षक श्री. शेख अनिस शेख कादर यांनी उत्कृष्ट कामगिरी नोंदवली. या स्पर्धेत राज्यभरातील ११ शिक्षकांनी उल्लेखनीय यश मिळवले, त्यापैकी शेख अनिस यांनी इयत्ता सहावी ते आठवीच्या भाषा विषयात तालुकास्तरीय प्रथम क्रमांक, तर सामाजिक शास्त्र विषयात द्वितीय क्रमांक पटकावून विद्यालयाचा गौरव वाढवला.

दिनांक ३० ऑगस्ट २०२५ रोजी आयोजित सत्कार समारंभात माननीय गटविकास अधिकारी श्री. समाधान वाघ आणि गटशिक्षणाधिकारी श्री. प्रकाश सपकाळ यांच्या हस्ते शेख अनिस यांचा पारितोषिक, सन्मानचिन्ह आणि शुभेच्छा देऊन गौरव करण्यात आला. यावेळी माजी गटशिक्षणाधिकारी श्री. आर. आर. पाटील, गटसाधन विभागाचे श्री. प्रवीण वायाळ, पंचायत समितीचे सर्व केंद्रप्रमुख, गटसाधन व्यक्ती आणि शिक्षक मोठ्या संख्येने उपस्थित होते.

उपस्थित मान्यवरांनी शेख अनिस यांचे अभिनंदन करून त्यांच्या पुढील शैक्षणिक वाटचालीस शुभेच्छा दिल्या. या यशामुळे श्री शिवाजी विद्यालय, चिखली येथील शिक्षक आणि विद्यार्थ्यांमध्ये आनंदाचे वातावरण आहे.

Leave a Reply

Your email address will not be published. Required fields are marked *