सैलानी बाबा यांचा फोटो, जयजयकार केवळ मतांसाठी….

कासिद / इफ्तेखार खान (चिखली) : निवडणूक म्हणजे साम, दाम, दंड, भेद इथपर्यंत ठिक होती परंतु आता “धर्म आणि आस्था” यांचाही वापर असा नवा फॉर्म्युला चिखली भाजपाने यावेळी अवलंबला आहे. महाराष्ट्राचे श्रद्धास्थान आणि हिंदू-मुस्लिम एकतेचे प्रतीक असलेले हाजी अब्दुल रहमान उर्फ सैलानी बाबा यांचा फोटो चक्क प्रचार बॅनरवर छापून मुस्लिम बहुल वॉर्डांमध्ये मत मागितले जात आहे. या प्रकारामुळे प्रभाग क्र. 4 सह चिखली शहरात प्रचंड रोष निर्माण झाला असून, “आस्थेचे प्रतीक असलेल्या सैलानी बाबांना मतांच्या राजकारणात ओढणे हे थेट धार्मिक भावनांचा अपमान आहे,” असा संताप नागरिक व्यक्त करीत आहेत.

          सैलानी बाबांचे दर्गा हे बुलढाणा जिल्ह्यासह महाराष्ट्र, मध्य प्रदेश, गुजरात, कर्नाटक अशा अनेक राज्यातील हिंदू, मुस्लिम, शीख, ख्रिश्चन अशा सर्व धर्मांच्या आणि सर्व जातींच्या लाखो भाविकांचे श्रध्दास्थान आहे. जत्रेच्या वेळी येथे २० लाखांहून अधिक भाविक दर्शनाला येतात. अशा विश्वासाच्या आणि एकतेच्या प्रतीकाला चक्क निवडणूक बॅनरवर छापून ” या उमेदवाराला विजयी करा ” असा संदेश देण्यात येत आहे.

          चिखली शहरातील काही नागरिकांनी “कासिद” शी बोलताना सांगीतले,”सैलानी बाबा हे आमचे श्रद्धास्थान आहेत. त्यांचा फोटो लावून मत मागणे म्हणजे आमच्या आस्थेला मतांच्या बाजारात लिलाव करणे आहे. भाजपाला फक्त निवडणुकीतच मुस्लिम आठवतात, बाकी ५ वर्षे ते आमच्याच विरोधात बोलतात. आता आम्ही फसणार नाही.

          पहिले मौलाना आझाद, आता सैलानी बाबा… हा भाजपाच्या उमेदवारांचा ढोंग आता उघड पडत आहे. ज्यांच्याविरुद्ध ते नेहमी बोलतात, त्याच मुस्लिम संत-महापुरुषांचे फोटो लावून मत मागणे म्हणजे खुलेआम फसवणूक करणे होय. सैलानी बाबांचे दर्शन घेणारे हिंदू भाविकांचे मते “सैलानी बाबा हे आमचेही कुलदैवत आहेत. त्यांचा फोटो राजकारणात वापरणे आम्हाला मान्य नाही. जो पक्ष देवदेवतांचा आणि संतांचा उपयोग मतांसाठी करतो, त्याला मत देणे म्हणजे स्वतःच्या श्रद्धेचा अपमान करणे आहे असा स्पष्ट इशारा दिला.

          “देव, संत, पैगंबर, गुरू यांचा वापर जर मत मागण्यासाठी होत असेल तर मग स्वतःच्या पक्षाची आणि उमेदवाराची किंमत काय ? जे स्वतःच्या ताकदीवर निवडून येऊ शकत नाहीत, त्यांना मत देण्याची गरजच काय ? “या सर्व प्रकरणामुळे चिखली नगरपरिषद निवडणुकीत भाजपाची गोची होण्याची शक्यता व्यक्त केली जात आहे. सर्व धर्मांच्या भाविकांतून भाजपाच्या या कृतीचा तीव्र निषेध होत असून, “आता आम्ही फक्त आणि फक्त विकासाच्या मुद्द्यावर मतदान करू, भावनिक ब्लॅकमेलिंगला बळी पडणार नाही,” असा निर्धार मतदार करीत आहेत. सैलानी बाबांच्या नावाने आणि फोटोने मत मागण्याचा हा प्रकार येत्या निवडणुकीत भाजपाला कितपत महागात पडणार, हे येणारा निकालच सांगेल. पण सध्या तरी चिखलीत “सैलानी बाबा की जय” असा नारा बुलंद होत आहे.